ජාතික ජන බලවේගය සංවිධානය කළ ජන රැලියේදී අනුර කුමාර දිසානායක ජනතා විමුක්ති පෙරමුණේ ජනාධිපති අපේක්ෂකයා ලෙස නම් කළේය. වෘත්තීයවේදීන්, විද්වතුන් යනාදි කණ්ඩායමකින් සැඳුම්ලත් සංවිධානයක් මාර්ගයෙන් ජනතා විමුක්ති පෙරමුණ තම ජනාධිපති අපේක්ෂකයා නම් කළේය. ජනතා විමුක්ති පෙරමුණට සෘජුව ජනාධිපති අපේක්ෂකයා නම් කළ හැකිව තිබුණත් ඔවුන් එය වක්‍රාකාරව කරනු ලැබුවේ වෘත්තිකයන්, විද්වතුන් සහ සිවිල් සංවිධාන රැසක සහයෝගය ඇතිවය. එය එක අතකින් හොඳය.
ජනතා විමුක්ති පෙරමුණ ගාලුමුවදොරට පැමිණි ජන සංඛ්‍යාවෙන් උද්දමායට පත්විය හැකිය. අවසන් ජනාධිපතිවරණ දෙකේදීම ඔළු ගෙඩි ගණනින් ප්‍රතිඵල තීරණය කළා නම් ලැබෙන්නට තිබූ ප්‍රතිඵල මීට වෙනස් වන්නට ඉඩ තිබිණි. ජන රැලියකට පැමිණෙන සෙනඟ හෝ ඔළු ගෙඩි ගණනින් හෝ ජනාධිපතිවරණයේ ප්‍රතිඵල තීරණය කළ නොහැක. එය දැන් යල්පැන ගිය ක්‍රමවේදයකි. ඒ නිසා ගාලුමුවදෙරට පැමිණිය ජන සංඛ්‍යාව ගැන ජනතා විමුක්ති පෙරමුණ එතරම් උද්දාමයට පත් විය යුතු නැත. කෙසේ නමුත් ගාලු මුවදොර පුරවන බවට පුරසාරම් දෙඩූ ප්‍රධාන පක්ෂ දෙක දෙස බැලීමේදී ජනතා විමුක්ති පෙරමුණ අද ලැබුවේ ජයග්‍රහණයකි.
ගෝඨාභය රාජපක්ෂ මහතා ශ්‍රී ලංකා පොදුජන පෙරමුණේ ජනාධිපති අපේක්ෂකයා කීවද ඒ සම්බන්ධයෙන් තවමත් ගැටලු පවතී. ඔහු තවමත් ඇමෙරිකානු පුරවැසියකු යැයි කියවේ. එනයින් බලන කළ දැනට ප්‍රකාශ කර ඇති එකම ස්ථීර ජනාධිපති අපේක්ෂකයා අනුර කුමාර දිසානායක ය. කෙසේ නමුත් මගේ පෞද්ගලික අදහස අනුව නම් ගෝඨාභය සහ අනුර කුමාර නම් කිරීම මුහුද හත් ගව්වක් තිබියදී අමුඩ ගැසීම හා සමානය. තවමත් බොහෝ දේ කීමට කල් වැඩිය.
අනෙක් අතට අනුර කුමාර ඉදිරිපත් කරන ලද්දේ ගෝඨාභයට ලැබෙන ඡන්ද කැඩීමට යැයි ඇතැම් අය කියති. එසේ නම් ගෝඨාභයට පමණක් නොව එක්සත් ජාතික පක්ෂය ප්‍රමුඛ සන්ධානයෙන් ඉදිරිපත් කෙරෙන ඡන්ද කැඩෙන බව අප අමතක නොකළ යුතුය. පසුගිය වර එක්සත් ජාතික ප්‍රමුඛ සන්ධානයෙන් ඉදිරිපත් කළ අපේක්ෂකයා වූයේ මෛත්‍රීපාල සිරිසේනය. එයින් පසු බලයට පත්වූ සිරිසේන වික්‍රමසිංහ ආණ්ඩුව ජනතාවට දුන් පොරොන්දු තඹ සතයකට මායම් නොකළේය. මේ තත්ත්වය මත හැට දෙලක්ෂය, සිරිසේන වික්‍රමසිංහ සමඟ සිටි බොහෝ දෙනා ද අද වනවිට ජනතා විමුක්ති පෙරමුණ ප්‍රමුඛ තෙවැනි බලවේගය සමඟ අත්වැල් බැඳගෙන ඇති බව සැඟ විය යුතු නැත.
නොවැම්බර් 9ත් දෙසැම්බර් 9ත් අතර දිනෙක ජනාධිපතිවරණය පැවැත්වෙනු ඇත. ඒ අනුව අවම වශයෙන් තවත් මාස හතරක් තිබේ. ඒ නිසා ජනාධිපතිවරණ ප්‍රචාරණ ව්‍යාපාරය සක්‍රීයව පවත්වාගෙන සෑම ජනාධිපති අපේක්ෂකයකු මුහුණ දෙන ප්‍රධාන අභියෝගයකි. මේ රටේ ජනතාව බොහෝ කලක සිට විකල්පයක් බලාපොරොත්තු විය. ජනතා විමුක්ති පෙරමුණට එම අවශ්‍යතාවට සරිලන පරිදි සැපයීම කළ හැකිද යන්න තවමත් තීරණය කළ නොහැක. කෙසේ නමුත් ජනතා විමුක්ති පෙරමුණට රාජපක්ෂ පාලනය, සිරිසේන වික්‍රමසිංහ පාලනය, දූෂණය, වංචාව, හැමදාම කියන සංවර්ධනය යනාදියට වඩා එහාගිය සටන් පාඨ සොයාගැනීමට සිදුවනු ඇත. වඩාත් ප්‍රායෝගික දෑ කියන්නට සිදුවනු ඇත. බොහෝ දේ සම්බන්ධයෙන් අලුතෙන් සිතන්නට සිදුවනු ඇත.
වාමාංශික ලේබලයට වඩා එහා ගිය සියලු ජන කොටස්, දේශපාලන කණ්ඩායම්, තරුණ ජන කොටස්, සුළු ජාතීන් යනාදී සියල්ල ආමන්ත්‍රණය කළ හැකි සටන් පාඨ සොයාගැනීමට සිදුවනු ඇත. වඩාත් ආකර්ෂණීය, ජනප්‍රිය මෙන්ම ප්‍රායෝගික සහ දිගුකල් දැක්මක් ඇති සැලසුම් ඉදිරිපත් කිරීමට සිදුවනු ඇත. ජනාධිපති සටනේ ජනතා ආකර්ෂණය ලබාගනිමින් රැඳී සිටින්නට නම් ප්‍රධාන පක්ෂ හෝ සන්ධාන හෝ දෙකට වඩා වෙනස් අලුත් සිත්ගන්නා ආකර්ෂණීය, ජනප්‍රිය, ප්‍රායෝගික සහ දිගුකල් දැක්මක් ඇති බොහෝ දේ කියන්නට කරන්නට පැහැදිලි කරන්නට සිදුවනු ඇත. වසර 70ක මෙරට පොරොන්දු දේශපාලනයෙන් ඔබ්බට යන්නට ජනතාවට දැනෙන දේ කියන්නට මෙන්ම ජනතාව අතර ජනප්‍රිය නැති එහෙත් දීර්ඝකාලීනව රටට අවශ්‍ය දේ ගැනද කතා කළ යුතුය. මේ සියල්ල සමබර ලෙස පවත්වා ගැනීම ඉතා අවශ්‍ය වේ.
ඡායාරූපය ලංකාදීප http://www.lankadeepa.lk/top_story/ජාතික-ජනබලවේගයේ--ජනපති-අපේක්ෂක-‘අනුර--කුමාර‘/10-555508
No comments:
Post a Comment