ජනාධිපතිවරයා අද (5) පැවැති රැලියේදී කරන ලද කතාවත් පසුගිය දිනෙක කරන ලද විශේෂ ප්‍රකාශයත් කිසිසේත්ම ජනාධිපතිවරයකුට සුදුසු නොවේ. ජනාධිපතිවරයාගේ ක්‍රියා කලාපය පසුගිය දින 10කට සීමා නොකළ යුතු නමුත් පසුගිය දින දහයක ඔහු හැසිරුණු ආකාරය සහ කරන ලද ප්‍රකාශ ඔහුගේ නොහැකියාව, කැබිනට් මණ්ඩලය තුළ තීරණ ගැනීමට ඇති නොහැකියාව, අශිෂ්ඨ හා අශීලාචාර බව පෙන්නුම් කරන්නක් බව අවධාරණයෙන් සඳහන් කළ යුතුය. ජනාධිපතිවරයා, රනිල් වික්‍රමසිංහ මහතා සහ එම කැබිනට් මණ්ඩලය ගන්නා ලද නිවැරැදි තීරණ සියල්ලේම සහ වැරැදි අහිතකර තීරණ සියල්ලේ වගකීම ද ඔවුන් සියලු දෙනා බාරගත යුතුය. රනිල් වික්‍රමසිංහ මහතා හෝ ආණ්ඩුවේ එක්සත් ජාතික පක්ෂ කණ්ඩායම වැරැදි තීරණ ගන්නා විට ඒවා නවතන්නට හැකියාවක් නොතිබූ බව ජනාධිපතිවරයා දිගින් දිගටම පෙන්නුම් කරමින් සිටී. ජනාධිපතිවරයා අද කරන කතාව ලැජ්ජා සහගතය. අශීලාචාරය. අශිෂ්ඨය. ඕනෑම ශීලාචාර සමාජයක අනෙකාගේ ලිංගික රුචිකත්වය, ජාතිය, ආගම, පෞද්ගලික රුචි අරුචිකම් එලෙස හෑල්ලුවට ලක් කිරීම කිසිදු ශිෂ්ඨ සම්පන්න මිනිසකුට සුදුසු නොවේ. ජනාධිපතිවරයා දිගින් දිගටම තමන්ගේ නොහැකියාවට අමතරව අශිෂ්ඨ හා අශීලාචාරකම පෙන්වමින් සිටින්නේය. ජනාධිපතිවරයා සහ රනිල් වික්‍රමසිංහ යන ධුරයෙන් නෙරපා දමන ලද අග්‍රාමාත්‍යවරයා යන දෙදෙනාම 2015 ජනවාරි 8 වැනිදා සිට ඔවුන්ට ජනතාව දුන් ජන වරම හෑල්ලුවට ලක් කළේය. ඔවුන් දෙදෙනාම තමන්ට ජනතාව ඡන්දය කුමටදැයි අමතක කළේය. රනිල් වික්‍රමසිංහ මහතා ප්‍රමුඛ එක්සත් ජාතික පක්ෂය දැන් එහි ප්‍රති විපාක විඳිමින් සිටින අතර මෛත්‍රිපාල සිරිසේන ජනාධිපතිවරයාට ද නුදුරේදීම එහි ප්‍රති විපාක විඳීමට සිදුවනු ඇත. මීට වසර තුනකට පෙර එනම් 2015 වසරේ ජනවාරි 8 වැනිදා ජනතාව මෛත්‍රිපාල සිරිසේන මහතාට හැට දෙලක්ෂයක් ජනතාව ඡන්දය දුන්නේ ඔහුට ඇති කැමැත්තට නොව මහින්ද රාජපක්ෂ මහතාගේ පාලනය ද ජන වරමට පිටුපා කටයුතු කරන්නට වීමට හේතු කරගෙනය.
මේ රට ඉදිරියට ගෙන යෑමේ අගනා අවස්ථාව මහින්ද රාජපක්ෂ මහතා එම අවස්ථාවේදී නැති කරගත්තේය. යුද්ධය අවසන් කළාක් මෙන්ම සාමය සහ සංහිඳියාව ගෙන එමින් රට සංවර්ධනය කරා ගෙන යෑමේ අති දුර්ලභ අවස්ථාවක් සහ ජන ප්‍රසාදයක් මහින්ද රාජපක්ෂ මහතාට හිමි ව තිබිණි. ඔහුත් ඔහු වටා සිටි පැවැත්මක් නොමැති බලලෝභී දේශපාලකයන් නිසාත් හරි දේ හරි යැයි කීමටත් වැරැදි දේ වැරැදි යැයි කීමටත් නොහැකි පාක්ෂිකයන් හා අනුගාමිකයන් නිසාත් රටට එම අවස්ථාව අහිමි වී ගියේය.
මහින්ද රාජපක්ෂ මහතාගේ පාලන කාලයේ අවසන් සමයේදී රට වේගයෙන් වළ පල්ලට ගමන් කරමින් තිබූ අතර යමක් හරියට කර ගැනීමට නොහැකි වූ සිරිසේන වික්‍රමසිංහ කාලයේදී රට සෙමෙන් වළපල්ලට ගියේය. එසේ යමින් වුවද බඩට නොදැනුන නමුත් යම් යම් සාධනීය, අනාගත අභිවෘද්ධියට හේතු වන වෙනස්කම් කිහිපයක් කිරීමටත් ආර්ථිකය යම් ස්ථාවර තැනකට ගෙන ඒමටත් එම ආණ්ඩුව සමත් විය. එහෙත් ඔවුහු කිරි කළයට ගොම වක් කර ගත්හ. ජනවරමට පිටුපෑ මෛත්‍රි ජනාධිපතිවරයාත් රනිල් අග්‍රාමාත්‍යවරයාත් එම ආණ්ඩුවත් ඊට වගකිව යුතුය.
අනෙක් අතට එවැනි තත්ත්වයක් මත ඉතිහාසයේ කවරදාකවත් නොවූ අයුරින් ආණ්ඩුක්‍රම ව්‍යවස්ථාව කඩ කරමින් මහින්ද රාජපක්ෂ මහතා අග්‍රාමාත්‍ය ධුරයට පත් කරමින් මෛත්‍රි ජනාධිපතිවරයා රටේ ජනතාවටත්, රටටත්, ජාත්‍යන්තරය ඉදිරියේ රටත් මහා අගාධයට ඇඳ දමා ඇත. ගැටලුව ඇත්තේ මහින්ද රාජපක්ෂ අගමැති කිරීම නොව ඒ සඳහා භාවිත කළ නීති විරෝධි, ව්‍යවස්ථා විරෝධි ක්‍රමවේදයයි. මෙය නරක පූර්වාදර්ශයකි. රටක නීති සහ ආණ්ඩුක්‍රම ව්‍යවස්ථාව යනාදිය සෑම විටම පූර්වාදර්ශ මත කටයුතු කරන පද්ධතිය. එවැනි තත්ත්වයක මෙම ප්‍රජාතන්ත්‍ර විරෝධි ක්‍රියා පිළිවෙත සම්පූර්ණයෙන්ම පරාජයට පත් කළ යුතුය. ජනතාවට හෝ පාර්ලිමේන්තුවේ මන්ත්‍රීවරුන් බහුතරයකට මහින්ද රාජපක්ෂ මහතා අගමැති කළ යුතු නම් ඒ සඳහා තිබෙන නෛතික නිශ්චිත ක්‍රමවේද භාවිත කළ හැකිය. ඒ ගැන අපට කිසිදු විවාදයක් හෝ ගැටලුවක් නැත. පාර්ලිමේන්තුවේ බැරි නම් රටේ මහජන මුදල් විනාශ නොකර සියලු පක්ෂ පොදු තීරණයක් ගෙන රටේ අගමැතිවරයා තෝරා පත් කරගැනීමට ජනතාවට ඉඩ දිය යුතුය. එහෙත් ජනාධිපතිවරයාගේ මෙම අශිෂ්ඨ, අශීලාචාර, ප්‍රජාතන්ත්‍ර විරෝධි, ආණ්ඩුක්‍රම ව්‍යවස්ථාවට පටහැණි, නීති විරෝධි ක්‍රියා පිළිවෙත පරාජයට පත් කළ යුතුය. ජනාධිපතිතුමනි ලැජ්ජයි.
ඡායාරූපය ළහිරු හර්ෂණ
https://www.facebook.com/photo.php?fbid=1950903035029359&set=a.122297774556570&type=3&theater
No comments:
Post a Comment