තට්ටු කරන්නාට දොර අරිනු ලැබේ

ජනවාරි 1 වැනිදා යනු තවත් එක් දවසක් පමණක් වන්නේ නැත. සෑම මසකටම පළමු වැනිදාවක් තිබුණත් ජනවාරි පළමු වැනිදා විශේෂය. විදුලි මීටරයේ ඉලක්කම් කැරෙන්නාක් මෙන් 2018, අට වෙනුවට 9 එක්වීමෙන් නව වසරේ උදාවේ සනිටුවහන් වේ.

අප සියලු දෙනා විශේෂයෙන්ම ශ්‍රී ලංකාවේ බොහෝ දෙනා ජීවිත ගත කරන්නේ දැඩි කලකිරීමකින් බව නොරහසකි. අප සියලු දෙනාටම සිහින තිබේ. බලාපොරොත්තු තිබේ. වඩාත් හොඳ ජීවිතයක් ගත කිරීම සියලු දෙනාගේ අපේක්ෂාවය. බලාපොරොත්තුව ද එයයි. එකිනෙකා ජීවිතය දකින්නේ අවුරුද්ද දකින්නේ වෙනස් වෙනස් ආකාරවලටය.

ජනවාරි 1 වැනිදා උණුසුම දින දෙක තුනකින් පහව යයි. ජනවාරියේ ටික දවසක් යනතෙක්ම අවුරුද්ද සටහන් කරන තැන්වල අපි 2018 යනුවෙන් ලියනු ඇත. පාසල් යන කාලයේ එය බොහෝ අවස්ථාවලදී සිදුවිය. අප රටක් ලෙස ආපස්සට යෑමට ප්‍රධාන හේතුව, දින ගෙවීගියත් අලුත් අවුරුදු ආවත් අතීතයේ ගුලි වී සිටීමයි. වෙනස් වෙනස් දේ කළ යුතුය. අත්හදා බැලීම් කළ යුතුය. රටක නම් සමාජ, ආර්ථික ප්‍රතිසංස්කරණ කළ යුතුය. එහෙත් අපි රටක් ලෙසත් පුද්ගලයන් ලෙසත් වෙනස්වීම මෙන්ම ප්‍රතිසංස්කරණ ප්‍රතික්ෂේප කරන්නෝ වෙමු. ඒ නිසා අප බොහෝ දෙනකුගේ ජීවිත අතීතය හා බැඳී පවතී. අතීතයෙන් ඉගෙන ගත යුතු දෑ බොහෝය. එහෙත් අප බොහෝ දෙනා අතීතයෙන් මිදීම වෙනුවට අතීතයටම ගුලි වෙමින් සිටින්නෙමු.

එනිසා හෙටින් ආරම්භ වන නව වසරේදී ඔබ ඔබේ ජීවිතය සොයායන්න. තමන්ගේ ජීවිතයේ සියල්ල ඇත්තේ තමන් සතුවය. තමන්ගේ ජීවිතය වගකීම ඇත්තේ තමන් සතුවය. ඔබ ඔබ සොයා යන්න. ආදරය කරන්න. තමන් කවුරුන් ද සොයා යන්න. අප ජීවිතවලදී වැඩි හරියක් කරන්නේ අනුන් ගැන සෙවීමය. එසේ සොයන්නට යාමෙන් අපට අපේ ආදරයත් ජීවිතයත් යන දෙකම නැති වී යයි. ඒ නිසා තමන් ගැන සොයන්න. තමන්ගේ ජීවිතයේ තේරුම සොයායන්න. ඇවිදින්න. ඇවිදින්න. ඇවිදින්න. සොයන්න.

ශුද්ධවර මතෙව්:

ඉල්ලන්න, ඔබට දෙනු ලැබේ; සොයන්න, ඔබට සම්බ වේ; තට්ටු කරන්න, ඔබට දොර අරිනු ලැබේ. මන්ද, ඉල්ලන්නාට ලැබේ; සොයන්නාට සම්බ වේ; තට්ටු කරන්නාට දොර අරිනු ලැබේ.

හර්ෂණ තුෂාර සිල්වා
31.12.18