පාර්ලිමේන්තුව විසුරුවා හැරීමෙන් පසු ඉතිරි වන්නේ අගමැතිවරයාත්, කැබිනට් මණ්ඩලයත් පමණි. නමුත් මෙවර පාර්ලිමේන්තුව විසුරුවා හැරි පසු, රාජ්‍ය හා නියෝජ්‍ය අමාත්‍යවරුද ඒ ආකාරයෙන් සිටින බව විවිධ පාර්ශව ප‍්‍රකාශ නිකුත් කළ අතර, තවත් පිරිස් කියා සිටියේ පවතින්නේ අගමැතිවරයා ප‍්‍රමුණ  කැබිනට් මණ්ඩලය පමණක් බවය. එසේ වුවද, ඔවුන් එම ධුරවල කටයුතු කරන්නේ, අදාළ කි‍්‍රයාවලිය පවත්වාගෙන යෑමට පමණි. සරල කියතොත් බාර කාර ආණ්ඩුවකි. පාර්ලිමේන්තුව විසුරුවා හැරීමෙන් පසු අමාත්‍යධුරවලින් ඉවත්වීම විහිළුවක් බව නැවත නැවත කියමි. එසේ කිරීමේ අවශ්‍යතාවක් නැත. ඡුන්දයක් තියෙන්නේ ආණ්ඩුවක් කැබිනට් මණ්ඩලයක් පත් කරගැනීමටය. පරාජයට පත්වන පිරිස විපක්ෂයේ අසුන් ගනු ඇත. රනිල් වික‍්‍රමසිංහ අගමැතිවරයා මෙන්ම මහින්ද රාජපක්ෂ හිටපු ජනපති සේම, වත්මන් කුරුණෑගල දිස්ත‍්‍රික් අපේක්ෂකවරයාත්, රජයෙන් වරප‍්‍රසාද වශයෙන් ලැබී ඇති වාහන වෙනුවෙන් අදාළ මුදල් ගෙවූ බව පසුගිය සමයේ වාර්තා විය. හිටපු ජනපතිවරයාට මැතිවරණ අපේක්ෂකයකු ලෙස පැමිණෙන්නැයි කවුරුවත් කීවේ නැත. ඔහු පැමිණිය පසු, ඔහුට ලැබුණු වරප‍්‍රසාද ඒ ආකාරයෙන්ම ලැබී ඇති අතර හරිනම් විය යුත්තේ ඔහුටත් සාමාන්‍ය අපේක්ෂකයකුට ලෙස සැලැකීමය. ප‍්‍රජාතන්ත‍්‍රවාදය යනු එයයි. යුද්ධය අවසන් කිරීමේ දී ඔහු දේශපාලන නායකත්වය දුන් බව හැබෑය. නමුත් සටන් බිමේ දහස් ගණන් හමුදා සාමාජිකයෝ ජීවිතය නොතකා සටන් කළහ. රටේ දෙපැත්තේ එකම රටේ වෙසෙන ජනතාව ජීවිතක්ෂයට පත්වූයේ සමාජ ගැටලූවලට පිළිතුරු නොලැබීම හේතුවෙනි. කරුණා අම්මාන්ට පාර්ලිමේන්තුවට පැමිණිය හැකි නම්, ශ්‍රී ලංකා නිදහස් පක්ෂයේ උප සභාපති විය හැකි නම් ප‍්‍රභාකරන්ටද ඒ අවස්ථාව හිමි විය යුතුය. මට හමු වූ පත්තර කලාවේ ජ්‍යෙෂ්ඨයකු, මෙසේ පැවැසීය. ( ඔහු මහින්ද රාජපක්ෂ මහතාගේ ආණ්ඩුව වෙනුවෙන් සාම සාකච්ඡුාවලට සහභාගී වූ කණ්ඩායමේ කෙනෙකි.) //ඇන්ටන් බාලසිංහම් සාම සාකච්ඡුාවලදි කිව්වා අර කැලේ ඉන්න හාදයට මේවා තේරෙන්නේ නැහැ// කියලා. ප‍්‍රභාකරන් කිසිම අවස්ථාවක සාමයට කැමැත්තක් දැක්වූවකු නොවන බව පැහැදිලිය. මහින්ද රාජපක්ෂ හිටපු ජනපතිවරයා ද ඒ සමාන ගති පැවැතුම් ඇත්තෙකි. ඔහුට යුද්ධය අවසන් කළ හැකි වුවද, සාමය දිනාගත නොහැකි විය. උතුරේත් දකුණේත් ජනතාවගේ හිත් දිනාගැනීමට නොහැකි විය. ඉහත කරුණ වෙත නැවත අවධානය යොමු කළොත්, කැබිනට් මණ්ඩලයේ අයෙකුට වුවද ඉල්ලා අස්විය හැකිය. අගමැතිවරයාට ද එසේ කළ හැකිය. නමුත් එහි ඇති පලය කුමක් ද. ඉන් ජනතාවට ලැබෙන දෑ, පණිවිඩය කුමක් ද. මේවා දේශපාලකයන් තම තමන්ගේ වාසි වෙනුවෙන් කරන දේවල්ය. එසේ ඉල්ලා අස්වීමේ අවශ්‍යතාවක් නැත. නොබෝ දිනකින් මැතිවරණයෙන් පැවැත්වෙන්නේ පාර්ලිමේන්තුවට මන්තී‍්‍රවරුන් පත්කර ගැනීමටය. එසේ තිබියදී ඉල්ලා අස්වීම විහිළුවකි.